မင်းသန့်မောင်မောင်ကတော့ ကျန်းမာရေးမကောင်းဖြစ်နေတဲ့ ဖခင်ဖြစ်သူကို အလုပ်တွေကူညီပေးချင်တဲ့အတွက် အမွေကို လက်ခံဖြစ်ခဲ့တယ်လို့ဆိုပါတယ်။ ပိုင်ဆိုင်ခွင့်ရထားတဲ့ မိသားစုဘဝကို ကျေနပ်တယ်လို့ ပြောပါတယ်။
ဒါရိုက်တာ စင်ရော်မောင်မောင်နဲ့ သရုပ်ဆောင် မေသန်းနုတို့ရဲ့ တစ်ဦးတည်းသော သားလေး မင်းသန့်မောင်မောင်က လက်ရှိပိုင်ဆိုင်နေရတဲ့ မိသားစုဘဝလေးကို ကျေနပ်တယ်လို့ မီဒီယာ အင်တာဗျူးတွေမှာဖြေဆိုခဲ့ပါတယ်။“ အခုလက်ရှိအခြေအနေလေးကို တော်တော်လေးကို စိတ်ချမ်းသာပြီးသား။ ဒီထက်ပိုပြီးလည်း ကျွန်တော် မလိုချင်ပါဘူး၊ ဒီထက်ပိုပြီးတော့လည်း မပေးသင့်ပါဘူး။ ကျွန်တော့်ကို ဒီဘဝပေးထားတဲ့အတွက် ဒီအတိုင်းလေးပဲ ရှင်သန်ပါတယ်။ ကျွန်တော့်ကို ခွန်အားပေးရင်၊ ပညာပေးရင်၊ ချစ်ခြင်းမေတ္တာပေးရင် ကျွန်တော် ကျေနပ်ပါတယ်” လို့ ဆိုပါတယ်။
မင်းသန့်မောင်မောင်ကိုတော့ ဖခင်ဖြစ်သူ ဒါရိုက်တာစင်ရော်မောင်မောင်က ပိုင်ဆိုင်ထားသမျှကို အမွေပေးထားပြီးဖြစ်တယ်လို့ သိရပါတယ်။ ဖခင်ကို ကူညီပေးချင်တဲ့စိတ်နဲ့ အမွေတွေကို လက်ခံခဲ့တာပါလို့ မင်းသန့်မောင်မောင်က ပြောပါတယ်။“ ကျွန်တော့်အတွက်ကတော့ ပြောရရင် စောပါသေးတယ်။ ဒါပေမယ့်လည်း ကျွန်တော့်အဖေ စိတ်ချမ်းသာအောင်၊ အသက်လည်းကြီးလာပြီ၊ ကျန်းမာရေးလည်းမကောင်းဖြစ်နေတယ်ဆိုတော့ သူ့နေရာကိုတော့ ကျွန်တော် ယူရတော့မှာပါ။ အဓိကကတော့ ပိုက်ဆံအတွက် သူ့နေရာကို လိုချင်လို့ မဟုတ်ဘူး ကျွန်တော် ကူညီပေးချင်လို့ လက်ခံလိုက်တာပါ” ဆိုပြီးတော့ ဒီဇင်ဘာလ ၃ ရက်နေ့က “တိမ်တွေပေါ်က ပန်း” ရုပ်ရှင်ဇာတ်ကားကြီး အထူးပြပွဲကို တက်ရောက်ရင်း ဖြေဆိုခဲ့တာပါ။
အဲဒီနောက် ဒါရိုက်တာ စင်ရော်မောင်မောင်ကလည်း သားလေးကို သွန်သင်ဆုံးမဖြစ်တဲ့အကြောင်းတွေ ပြောပြခဲ့ပါတယ်။“ သားသားကို လူရယ်လို့ဖြစ်လာရင် မြင့်သထက်မြင့်အောင် ကြိုးစားကြမယ်လို့ပြောထားတယ်။ လူရယ်လို့ဖြစ်လာရင်လည်း ကိုယ့်ဘဝကို အကောင်းဆုံးဖြစ်အောင် တည်ဆောက်ရတယ်လေ။ ဘဝကိုလည်း ကျေနပ်ရတယ်၊ လောကကိုလည်း အလှဆင်ရတယ်။ ကိုယ့်ဘဝကိုယ်လည်း မြင့်သထက်မြင့်အောင် ကြိုးစားရတယ်” လို့ သူကဆိုပါတယ်။
မင်းသန့်မောင်မောင်ကိုတော့ မေသန်းနုနဲ့ အတူ တီဗီကြော်ငြာတွေမှာ ကလေးသရုပ်ဆောင်အဖြစ် ပါဝင်ကတည်းက ပရိသတ်တွေ စတင်သိရှိခဲ့တာဖြစ်ပါတယ်။ သူဟာ အရွယ်ရောက်လာတဲ့အချိန်မှာတော့ အမေရိကန်နိုင်ငံ လော့စ်အိန်ဂျလိစ်မြို့မှာရှိတဲ့ New York Film Academy မှာ ၃ နှစ်ကျော်အကြာ ပညာသင်ကြားခဲ့တာ ဖြစ်ပါတယ်။ အဲဒီနောက် Bachelor of Fine Arts ဘွဲ့ကို ရရှိပိုင်ဆိုင်ခဲ့ပါတယ်။ အခုဆိုရင်တော့ ဖခင်ဖြစ်သူနဲ့အတူ ရုပ်ရှင်ဇာတ်ကားကြီးတွေ ရိုက်ကူးနေပြီလို့ သိရပါတယ်။
ဆယ်လီရပ်ကွက်
