ပရိသတ်တွေရဲ့ ချစ်ခြင်းများစွာကို ရရှိထားတဲ့ အနုပညာရှင် ဇနီးမောင်နှံဖြစ်တဲ့ ပြေတီဦးနဲ့ အိန္ဒြာကျော်ဇင်တို့ကတော့ ဆိုရှယ်မီဒီယာမှာ သူတို့ရဲ့သားသမီးများရဲ့ဓာတ်ပုံများကို တင်တဲ့အခါ သတင်းမီဒီယာများ ကူးယူဖော်ပြခြင်း မပြုပါရန်လို့ ထည့်သွင်းရေးသားရတာနဲ့ ပတ်သက်ပြီး ပြေတီဦးက အခုလို ပြောပြခဲ့ပါတယ်။
“သတင်းမီဒီယာများမှာ ကူးယူမဖော်ပြရန် မေတ္တာရပ်ခံပါတယ်ဆိုတာကလေ ကျနော်တို့က အူဝဲရဲ့ Page မှာပဲဖြစ်ဖြစ်၊ ကျနော့်ရဲ့အကောင့်မှာပဲဖြစ်ဖြစ် ကိုယ့်ရဲ့မိတ်ဆွေတွေ အပေါင်းအသင်းတွေ၊ ပရိသတ်တွေပဲ ရှိတာဆိုတော့ ကျနော်တို့က သူတို့ကိုသိစေချင်တဲ့ အကြောင်းအရာလေးတွေ ပျော်စေချင်တာလေးတွေ ဒီလို စိတ်ဆန္ဒနဲ့ တင်လိုက်တာပေါ့”
“ကျနော်တို့တင်တဲ့ အကြောင်းအရာ၊ ပြောပြချင်တဲ့အကြောင်းအရာက တမျိုးပေါ့။ ဒါကို တချို့မီဒီယာ အသစ်တွေလည်း ရှိတယ်။ ကျင့်ဝတ်နားမလည်တဲ့ မီဒီယာတွေလည်း ရှိတယ်။ အခုလို ကျနော်တို့နဲ့ ရင်းနှီးပြီးသားဖြစ်တဲ့ မီဒီယာတွေက ပြောစရာအကြောင်း မရှိဘူး။ ကျနော်တို့ ပေးချင်တဲ့ အဓိပ္ပာယ်နဲ့ ဆန့်ကျင်ဘက် ပရိသတ် အထင်အမြင် လွဲမှားအောင် ခေါင်းစဉ်တင်လို့တော့ အဆင်မပြေဘူးပေါ့”
“အဲဒါကြောင့် ကျနော်တို့အနေနဲ့က ဘယ်မီဒီယာမှာတော့ တင်ပါ၊ ဘယ်မီဒီယာက မတင်ပါနဲ့ဆိုပြီး ခွဲခြားပြီးပြောဖို့က ခက်တယ်လေ။ ဒါကြောင့်မို့ သတင်းမီဒီယာများမှာ ကူးယူဖော်ပြခြင်း မပြုပါရန် မေတ္တာရပ်ခံပါတယ်ဆိုပြီး ထည့်လိုက်ရတာပေါ့။ ဒီလိုမတင်တော့ ယူယူတင်တဲ့အခါမှာ ခဏခဏ ပရိသတ်နဲ့ အထင်အမြင်လွဲမှားမှုတွေ ဖြစ်တယ်”လို့ ပြေတီဦးက ပြောပါတယ်။
အမျိုးမျိုး ပေါ်ထွက်လာတဲ့ ကျင့်ဝတ် နားမလည်သော မီဒီယာများကြောင့် သားသမီးပုံများကို ကူးယူတင်ခွင့်မပြုတော့ဘဲ ကန့်သတ်လိုက်တာဖြစ်တယ်လို့ ပြေတီဦးက ဆိုပါတယ်။ ပြီးခဲ့တဲ့ရက်ပိုင်းကလည်း ပြေတီဦးက ရုပ်ရှင်ဇာတ်ကားတကား ရိုက်ကူးနေတာကြောင့် သူ့ရဲ့ Facebook အကောင့်ကို Deactivate လုပ်ခဲ့ပြီး စိတ်မကောင်းစရာ သတင်းများကို ဖတ်တဲ့အခါ စိတ်ထဲစွဲနေမှာ စိုးတာကြောင့် လုပ်ခဲ့တာလို့ သိရပါတယ်။
“Facebook မသုံးဘူးဆိုတာက ကျနော်ရိုက်နေတဲ့ “ငရဲဆို ချိုနဲ့လား” ရုပ်ရှင်က ရိုက်ရက်ကြီးပဲ ၂ လလောက်ကြာတယ်။ ရိုက်ကွင်းပေါ်မှာပဲဖြစ်ဖြစ်၊ ရိုက်ကွင်းမှာပဲဖြစ်ဖြစ်၊ စိတ်မကောင်းစရာ သတင်းတို့၊ ဘာတို့ကဟိုးအရင်ကတော့ ပြဿနာမရှိဘူး။ သတင်းကို သတင်းလိုပဲ ဖတ်လိုက်တာပေါ့”
“အခုကျတော့ သားသမီးတွေ ရလာတော့ ကလေးလေးတွေနဲ့ ပတ်သက်တဲ့ သတင်းပါလာပြီဆိုရင် အရမ်းကို နေလို့ထိုင်လို့ မကောင်းအောင် ခံစားရတယ်။ နေလို့ကို မကောင်းဘူး။ စိတ်ထဲမှာ စွဲနေပြီးတော့ စိတ်ကလေးပြီး တမျိုးကြီးဖြစ်နေရော။ အဲ့လိုဖြစ်ရင် ကိုယ်ရိုက်တဲ့ကားပေါ်မှာ ထိခိုက်မှာစိုးလို့ အကောင့်ကို ပိတ်ထားလိုက်တာပေါ့” လို့ ပြေတီဦးက ပြောပါတယ်။
သားသမီးများကြောင့် စိတ်ခံစားချက်များလည်း ပြောင်းလဲလာခဲ့ပြီး ကလေးများနဲ့ ပတ်သက်တဲ့ သတင်းများ ဖတ်မိတဲ့အခါမှာ ရုပ်ရှင်ရိုက်ကူးမှုကိုပါ ထိခိုက်စေနိုင်တာကြောင့် ဆိုရှယ်မီဒီယာကို မသုံးဖြစ်တာလို့ ပြေတီဦးက ဆိုပါတယ်။ သရုပ်ဆောင် ပြေတီဦးနဲ့ အိန္ဒြာကျော်ဇင်တို့ ဇနီးမောင်နှံကတော့ “ပြေသုဒြာ” နဲ့ “ပြေဓီရ” ဆိုတဲ့ ချစ်စရာကောင်းတဲ့ သားနဲ့ သမီးကို ပိုင်ဆိုင်ထားပါတယ်။
ဧရာဝတီ
